Hiru gazta-mota probatu ahal izango dira martitzenean antzokian egingo duten dastatze egunean: Soraluzeko Egotza baserriko ahuntz gazta, Elgoibarko Mausitxako ardi gazta eta Mallabiako Axelekuko behi gazta. Gaztari laguntzeko Mutrikuko Sagarmina txakolina ere partituko dute.
Santiago eta Santa Ana jaien baitako ekitaldia izango da. 18:30ean hasita, ordu eta erdiko ekimena antolatu dute, doakoa. Aurkezpenarekin abiaraziko dute, azalpen orokorra emanez. Eta ondoren hasiko da dastaketa. Antzokian bertan izango dira gazta eta txakolin egileak eurak ere, nork bere produktuari buruzko xehetasunen berri ematen.
Soraluzeko Udalak, Debemenekin, Debabarreneko Landa Garapen Elkartearekin elkarlanean antolatu du dastatze eguna.