“Umetatik brodatzen dut. Gero, batxilergoan lau urtez landu nuen joskintza, Home economics ikasgaiaren barruan. Moda eta diseinu ikasketak ere egin nituen”, kontatu du Saadia Nasirrek.
Presidentearen lan-taldekoa
17 urterekin, Saadia jostuna zen, eta erakusketa handietan ere parte hartzen zuen. Gutxira, aldatu egin zuen ogibidea. “Irakasle izan nintzen ia hiru urtez, eta gero hegazkineko-laguntzaile 15 bat urtez (azafata), Pakistan International Airlinesen”.
Pakistango presidente Pervez Musharrafen lan-taldeko kide izatera ere iritsi zen, beste 15 bat profesionalekin batera "bakarrik berarendako egiten genuen lan hegazkinean. Mundu osoan ibili izan gara". Pakistango presidenteak kargua utzi (2008) eta gutxira, nasirtarrek Pakistandik alde egin behar izan zuten, segurtasun arrazoiak medio.
Oraingoari eutsi nahia
Tristura handiz ekin zioten bizitza berriari Soraluzen, baina Maite Gorostidiri eta haren alaba Oihanari esker hasi zen Saadia jostun eta 2015eko Gaztañerre azokan hasi zen enkarguak hartzen.
“Bizitza berria dut, eta horri eutsi nahi diot. Egunean 6-8 ordu ematen dut josten, batzuetan baita gauerdira arte ere. Gutxi irabazten dut, baina oso pozik nago. Soraluzetarrei eskerrak eman nahiko nizkieke konfiantzarengatik, bihotz-bihotzez. Etorkizunean, denda ipini nahi nuke bertan, Soraluzen bizitzen segitu nahi dugulako, eta oihalak saldu eta joskintza zein estetika zerbitzuak eskaini nahiko nituzke, ze estetika eta ile-apaintzaile ikasketak egin berri ditut hemen".