Erremate lanak egiten dabiltza egunotan Errabal kalean. Bereziki, botatako etxeen aurreko aldea txukuntzen. Eta datozen egunotan bukatuko dituzte urbanizazio obrari dagozkion gainontzekoak.
Horrez aparte, Zubi Nagusiko jarlekuak eta jardinerak bihar ekarriko dituzte Patria-koek.
Norabide bakarrekoa
Izan ere, martitzenean zabalduko dute Errabal kalea zirkulaziora.
Hori horrela, Estaziñoko errepidea norabide bakarrekoa izatera pasatuko da berriro. Bertako semaforoak kendu egingo dituzte, eta Eibarko noranzkoan dagoen markesina SAPAra eramango dute. Era berean, Ezozibidean behin-behinerako egokituta zegoen geltokiko haima ere erretiratuko dute.
Izan ere, Errabal zabaltzeaz batera, Zubi Nagusian izango da aurrerantzean autobus geltoki nagusia, herritarrek galdeketan erabakitakoari segituz.
Bertarako markesina enkargatuta dauka Udalak; seinaletika, berriz, egunotan lekualdatuko dute. Eta Lurraldebus eta Pesa aldaketen jakinaren gainean daude.