Geltokiari buruzko herri-galdeketan erabakitakoarekin aurrera eginez, autobus geltokia zubian ipini ahal izateko bertan zeuden lurrazpiko edukiontziak kendu egin behar izan zituen Udalak.
Haien partez, ohiko edukiontziak ipini zituen, zubian, gaztetxearen ondoan. Eta ondoren, Baltegieta kalera lekualdatu zituzten, kiroldegi ondora, Patria telesailaren grabaketengatik.
Bada, erdigunean egin beharreko obrak egin ondoren ere, edukiontziak orain dauden lekuan geratuko direla erabaki du Udalak. Iker Aldazabal jarduneko alkatearen esanetan, orain dauden lekuan ez denez bizilagunik bizi, “inori ez diote eragozpenik eragiten”. Hori eta “herri estetika” aintzat hartuta erabaki dute bertan lagatzea.