Lurrean, eskuetan zein airean jarri zituzten dantzan tronpak

Jorge Morales txapeldunaren gidaritzapean, bi mailatan banatuta, bigarren tronpa txapelketa egin zuten frontoian. Ohi denez, Moralesek filigranak egin zituen tronparekin, eta gero ariketak eragin zizkien lehiakideei, hori bai, berak egindakoak baino errazagoak. Gustura geratu ziren, bereziki, saria eskuratu zuten sei lagunak.

Txikien maila eta nagusien maila. Biak antolatu eta tronpa lehiaketa egin zuten frontoian aurten bigarren aldiz, Jorge Moralesek, Mexikoko, Ekuadorko eta Espainiako tronpa txapeldunak gidatuta.

Zapaturako aurreikusita zegoen topaketa astelehenera aurreratu zuten, partaide gehiago erakartzeko asmoarekin, baina akaso justu horregatik-edo, bestetan baino ikusmin txikiagoa izan zuen Moralesek frontoiko saioan.

Kontuak kontu, gauzatu zen berau eta bertaratutakoek Moralesek eskatutako trukoak egin zituzten tronparekin, nor baino nor. Maila bakoitzeko onenak aukeratuta, hiruna saridun izan ziren: Hamza, Suhaib eta Awais nagusien mailan eta Ander, Raza eta Abdul txikiagoen mailan. Tronpak eta baloiak oparitu zizkien irabazleei Moralesek.