Iker Bicente nagusitu zen Ezoziko Jaietako erakustaldian

Iker Bicentek eta Aitzol Atutxak aizkora erakustaldi ikusgarria eskaini zuten domekan Ezozin. Otsagabiarra nagusitu zen segundu batzuen aldearekin. 

Eguerdiko meza amaitu eta berehala, Eneko Beretxinaga eta Jokin Bergara bertsolariek heldu zioten mikroari eta bertsotan egin zioten sarrera ondoren etorri zen aizkora erakustaldiari.

Plazan ehun eta berrogeita hamar bat lagun zirela ekin zioten Bicentek eta Atxutxak tenteko egurrak mozteko lanari. Ostean, kanako bina egur ebaki zituzten, eta, segundu gutxi batzuengaitik izan bazen ere, Bicente nagusitu zitzaion Atutxari. 

Ikusleek txalo artean agurtu zituzten aizkolariak eta neska-mutikoek laster salto egin zuten plazaren erdira ezpalak batzera. Horrelaxe, goiz parteko jaia pasatuta, amaitu ziren aurtengo Ezoziko Jaiak, ohikoa baino laburragoak.