Batzokiko (Pagoeta taberna) eta Txokoko terrazak figurantez bete zituzten atzo Patria telesailaren errodajea dela-eta. Soraluzetarrekin batera, bertan izan ziren Ermutik, Eibartik, Zumarragatik, Gasteiztik… etorritako figuranteak, asko iada ezagunak. Kalebarren ere okupatu zuten errodajerako, 80ko-90eko hamarkadako ibilgailuz, besteak beste. Eta udaletxe aurrean ere ibili ziren grabatzen.
Gaurkoari dagokionez, Bolia tabernaren kanpoko zein barruko aldean errodatuko dute, taberna Arrano bilakatuz telesailerako. 17:30etik 04:30ak arteko baimen eskaera egin dute, eta Erregetxe osoa libre lagako beharko da gaur 15:30erako.
Barikuan 05:30ak arte
Eta Soraluzeko errodajeak barikuan bukatuko dira. Errekalde kalearen 31. zenbakitik 33. zenbakirainoko tartean grabatzeko baimen eskaera dute eginda, 18:30etik 05:30era bitartean.
Hain zuzen ere, atzo grabazio horren entsegua egin zuten, besteak beste, garabi handia erabili behar dute-eta Soraluzeko azken hitzorduari dagozkion eszenak grabatzeko, telesailean azaltzen diren ETAkideen ihesa grabatu behar dutelako, Errekaldeko hainbat etxetako terrazetan.