Txankarrankoa, banakoa, fandangoa, zazpi jauziak… halako eta bestelako euskal dantza tradizionalak bertatik bertara ikusteko aukera paregabea eskaini zuten atzo Debagoieneko dantzari gazteek.
Kalerik kale jardun zuten lehenengo, eta ohi denez, plazan egin zituzten goizeko zein arratsaldeko saio nagusiak, alardeak, talde guztiek elkarrekin. Plaza Zaharraren gerizpean begira izan zituzten kanpoko eta bertako ikusle ugari, eta haiek txaloekin eskertu zieten dantza saioa, horrenbeste dantzarirekin, ikusgarria izan zena.
Bestalde, Euskal Jaiaren bueltan zubira atera zituzten postuak Soraluzeko eskulangileek. Haiek ere izan zuten lana, ikusle eta erosle nahikotxo ibili zen-eta artisau azokan.