Iazko moda desfilearen arrakasta ikusita, aurten esperientzia errepikatzea erabaki dute Bizikale Merkatari Elkarteko kideek, eta beste desfile bat egingo dute ekainaren 14an, barikua.
Hain justu, egun horretan, Bizikale Azoka egingo dute, eta elkarteko merkatariek plazara aterako dituzte euren produktuak, jai giroan. Azoka borobiltzeko, egingo dute, hain justu, moda desfilea.
Jantzi, orraztu eta makillatu
Iaz moduan, aurten ere, herritarrak nahiko lituzkete herrian saltzen diren jantziak eta bestelakoak pasarelan erakuts ditzaten. “Edozein adin tarteko” modeloak behar dituzte, eta ekainaren 3ra arte dute interesdunek izena emateko epea, Bizikale elkarteko kide diren edozein saltokitan.
Desfile egunean, zein baino zein dotoreago ibiliko dira pasarelan, Kooperatibako, KLB-6 saltokiko eta Fanny Mertzeriako jantziak soinean dituztela. Jantziak desfilatzen laguntzeko, gainera, modeloak apaindu egingo dituzte, bertako ile-apaintzaileek (Ainhoa, Marisa eta Mabel ile-apaintzaileek) eta makillatzaileek (Lilura).
Iaz 30 bat herritarrek parte hartu zuen desfilean.