Kantuak eta dantzak uztartuta, eta Plaentxi Herri Ikastetxeko HHtik LH2ra arteko ikaskideak begira zituztela taularatu zuten atzo Sushi Dragoi Kosmikoa ipuin musikatua Soraluzeko Musika Eskolako ikasle gazteenek.
Pedagogia egitea helburu izanda, ipuina eta musika baliatuta aurkeztu zituzten instrumentuak familiaka, haien historia eta jatorria kontatuz, besteak beste: haizezko instrumentuak, sokazkoak, perkusiokoak eta teklatuak (polifonikoa).
Ipuinean, instrumentuak hainbat planetatan bahituta zeudela irudikatu zuten; hala, musika egin ahal izateko, beharrezkoa zuten instrumentuok askatzea. Hori egin zuten musika eskolako ikasleek, kantuka eta dantzaka, bertan zeuden ikusleek lagunduta.
