60 lagun pasa elkartu zen atzo, martitzena, udaletxe ondoko aldapan (Plaza Berria okupatuta zegoen) Soraluzen izandako azken eraso matxista salatzeko.
Salaketarik ez
Korner Morea Elkarte Transfeministak deituta, protesta ekimenean jakinarazi zuten azken eraso matxistaren kasuan ez dela erasotzailearen kontrako salaketarik egon biktimaren aldetik, eta adierazi zuten horrek “zaildu” egiten duela gizonezkoaren kontrako neurririk hartu ahal izatea. “Ez dago gauza asko egiterik, egia esateko”, gaineratu zuten.
Horrekin batera, azpimarratu zuten 2015etik 2019ra salaketa bakarra egon dela Soraluzen biolentzia matxistarekin lotutakoa, eta aldiz, 2019an dagoeneko hirugarren aldiz irten direla kalera beste horrenbeste indarkeria kasu salatzeko. “Urte beltza daramagu”, esan zuten.
Bestalde, Soraluzeko Udalak "gogor salatu" du azken erasoa, adierazpen instituzionala baliatuta.