Auto zaharrak, antzinako jantziak, errotulu zaharrak, farolak, kaleak bustita… detaile guztiak kontuan hartuta jantzi dute egunotan Soraluze, eta modu berean jantzi dituzte Patria telesailean figurante moduan agertuko diren soraluzetarrak eta kanpotarrak, grabazioetarako. Azken horien kasuan, Ermuatik, Donostiatik eta Arrasatetik… etorri dira.
Asteko lehen egunotan, Errekalden, Zubi Nagusian eta Ola inguruan dihardute grabatzen. Eta, noski, askok aprobetxatu dute halako proiektu handi bat zela grabatzen den ikusteko eta hura erakusten duten argazki eta bideo mordoa ateratzeko.
Barikuan 04:30ak arte
Bihar, eguaztena 10:00etatik 22:00ak arte arte zubian segituko dute. Eta bihar ere, Gabolatseko zubi txikian eta Gabolatsen ibiliko dira grabatzen, 11:00etatik 22:00etara. Eguenean, berriz, 10:00etatik 22:00ak arte, Ezozibideko 4 eta 8 zenbakien artean ibiliko dira. Eta oraingo astekoarekin bukatzeko, barikuan grabatuko dute Zubi Nagusian 17:30etik 04:30ak arte eta Gabolatsen 17:00etatik 22:00etara.
Datorren asteari dagokionez, berriz, ez dute grabaziorik iragarri Soraluzen. Gauzak horrela, bi aste barru bueltatuko dira hona.