Martitzenean egin zuten 2018. urteari dagokion batzar orokorra Itxaropena Erretiratuen Elkartean. 98 bazkide bertaratu ziren eta mahai gainean hainbat gai izan zituzten aztergai, tartean, zuzendaritza aldaketa eta urteko kontuak eta jardunak.
Kide berriak
Hori horrela, eta lehen puntuari dagokionez, eskua altxatuta egin zuten zuzendaritza batzordeko kide berrien aukeraketa, eta honakoek eskuratu zituzten boto gehien: M. Pilar Oregik, M. Ines Tornosek, J. Andres Txintxurretak eta Angel M. Catalanek. Azken horiek ordezkatuko dituzte Maria Luisa Gantxegi, Elena Vega, Sergio Zabala eta Iñaki Quintanilla. Bi urterako hartu dute kargua kide berriek.
Bestalde, urteko kontuei dagokienez, 19.400 euroko aurrekontua aurreikusi dute 2019rako. Kopuru horrekin, besteak beste, kultura ekimenak, 80 urtetik gorakoen bazkaria, karta-joko lehiaketa, gastronomia lehiaketa eta abar antolatzen dituzte.
589 bazkide
Itxaropena Erretiratuen Elkarteak 589 bazkide ditu gaur egun. 2018an 32 bazkideren baja eta 18 bazkideren alta izan zituzten. Udalarekin izandako harremanari dagokionez, “egokia” izan dela baloratu dute. Eta besteak beste, jakinarazi dute wi-fi zerbitzua mantentzen segituko dutela.