Martxoak 8

Pentsiodunak ere emakumeen grebarekin bat

“Konturatu barik eredu” bilakatu direla azpimarratu dute pentsio publiko duinen aldeko gaurko elkarretaratzean, “baliabide gutxirekin” euren ahotsa entzunaraztea erabaki eta euren presentziarekin “hemen gare oihukatzea” lortzen dabiltzalako. Horrez aparte, Martxoaren 8an “planto!” esan eta “emakumeen grebarekin” bat egingo dutela jakinarazi dute, ekitaldietan parte hartzeaz gainera.

Zela ez, Martxoaren 8ko astea den honetan, emakumeengan ipini dute iparra eguerdian pentsio publiko duinen alde egindako elkarretaratzean.

95 bat herritarrek babestuta, eta azpimarratuta emakumeak direla gizartean %50, hainbat salaketa konpartitu dituzte:

  • Gizonek baino %37 erretiro pentsio baxuago kobratzen dute.
  • Pentsioen zenbatekoa ere txikiagoa da, batez ere miseriazko alarguntza pentsioetan, EAEn batez beste 816,16 euro. Eta alarguntzan pentsioen %93a emakumeek jasotzen dute.
  • 2016an gizonezkoen erretiro pentsioa emakumezkoena baino %79 altuago zen.
  • “Ezkutuko ekonomian, etxeetan zein zaintza lanetan ez dugu lan duin eta kotizaturik izateko aukerarik eduki eta pobrezia edo mendekotasun egoerara kondenaturik ikusi dugu gure burua”.