09:15ak aldera Plaza Berritik abiatu, eta mendiko bidezidorretatik zehar, 10:45erako ailegatu zen lehen mendizale taldea Urkia Zelaira. Ordurako ja guztia gertu zegoen bertan: landatu beharreko pagoak, haiendako zuloak eginda eta ongarri izango zuten konpostez betetako bi poltsa.
Arbolen onurak
Ingurumen teknikariaren eskutik zuhaitzen garrantziari buruzko azalpenak entzun zituzten lanean hasi aurretik. Izan ere, arbolak oxigeno sortzaile dira, lurrari eusten laguntzen diote sustraiei esker, hainbat animaliaren bizitoki dira, lurzorua elikatzen dute hostoekin (humusa…) eta beste makinatxo bat onura dituzte.
Arrakasta handia
Eta horren ondoren, taldeka banatu eta gogor ekin zioten lanari umeek, gazteek eta helduek, 70 bat lagunek guztira, eguraldia lagun, pago kimuak hesolen barruan ondo sartuta laga nahian. Egun borobilari amaiera borobila emateko, Izai elkartean prestatutako luntxaz gozatu zuten.
Soraluzeko Udalak ekimenaren balorazio oso positiboa egin du: “Egun honek arrakasta handia lortu baitu beste behin ere, herritarren eta batez ere, gaztetxoenen parte hartze handiarekin. Soraluzeko Udalak eskerrak eman nahi dizkie bertaratutako guztiei”.