Gaur, eguena, Errabaleko lanen jarraipena egiteko asteroko ikuskaritza egin dute Soraluzeko Udaleko, Ur Kontsorzioko eta obrako arduradunek. Obrak martxa onean doazela ikusi dute bertatik bertara. Lurrazpiko hoditeriak berritzeko lanak eginda daude kiroldegiko partetik Gila tabernaraino, eta errepidea tapatuta laga dute dagoeneko.
Iker Aldazabal alkateak jakinarazitakoaren arabera, datorren astean langile-talde berria gehituko da lanetara, Zubi Nagusitik Errabalerainoko tramuko lurrazpiko lanak ahalik eta lasterren egiteko. Orain arte egin duten moduan, datozen asteetan ur-harguneak, eta euri-uren eta ur-zikinen hodiak berrituko dituzte hurrengo zatian.
Zoladura lanak
Behin lanok bukatuta, dena tapatuta lagako dute eta asmoa da ere espaloiaren zenefak ipinita lagatzea, martxo bukaera ingururako. Ondoren etenaldia izango dute obrek, ‘Patria’ telesailaren grabazioak egin bitartean. Oraindik grabazio-planaren xehetasunak, baina, ez dizkiote helarazi Soraluzeko Udalari.
Kontuak kontu, grabazioak bukatuta egingo dituzte Errabaleko urbanizazioaren erremate-lanak: zoladura lanak bukatu, besteak beste, eta bukaerako kolore gorria eman. Uda ingurua izango dela da aurreikuspena. Eta lan guztiak bukatu arte, besteak beste, ez dituzte lekuz aldatuko autobus geltokiak.