Piztu Itxaropena izenarekin, Saharako kanpalekuetan bizi diren errefuxiatuei laguntzeko XV. Euskal Karabana abiatuko da martxoaren 2an Laudiotik. Eta karabana hori betetzeko elikagaiak batzen dabiltza egunotan, besteak bete, eskualdeko udalerrietan.
Soraluzeri dagokionez, atzora arte, eguaztena, Kooperatiban izan da elikagaiak eramateko aukera. Lau kaxa pasa bete dituzte.
Ikastetxera eraman daiteke
Plaentxi Herri Ikastetxeari dagokionez, berriz, bihar arte, otsailaren 1, eraman daiteke janaria. Bereziki behar dituzte honako elikagaiak: arroza, lekaleak, azukrea, atuna eta sardinak oliotan, pasta eta olioa.
Eta era berean, Sahara Emakumeen Batasun Nazionalak konpresen beharra berretsi du “emakumeendako oinarrizko eta ezinbesteko garbitasun” produktuak direlako.
Osasun arazo handiak
Saharar Herriarekiko elkartasun taldeek gogora ekarri dutenez, “saharar errefuxiatuek Tindoufeko (Aljeria) kanpalekuetan bizirik irauteko ezinbestekoa da kanpotik datorren laguntza. Tindoufeko errefuxiatu kanpalekuetan baldintza penagarrietan bizi dira, eta osasun arazo handiak sortzen ari zaizkie, batez ere, 5 urtetik beherako umeei eta haurdun eta bularra ematen ari diren emakumeei".