Aurten 'ibaia' aukeratu dute gaitzat, Plaza Barriko etxola girotzeko

Aurten 'ibaia' aukeratu dute gaitzat, Plaza Barriko etxola girotzeko
Olentzero eta Mari Dominginen etorrera prestatzen diharduten herritarrak. Argazkia: F. Oregi.

Ibaia eta bere historia izan da aurten Plaza Barriko etxola eta ingurua girotzeko aukeratu duten gaia. 

Pil-pileaneko eta Kukumixoko kideek urtero baliatzen dute Olentzero eta Mari Domingiren etxola “istorio bat” kontatzeko eta “balore batzuk” transmititzeko. Aurten, ibaiaren inguruko historia aukeratu dute gai moduan: “Alkarrekineko lan-taldeak bilketa lan ederra egin du eta uste dugu garrantzitsua dela gaztetxoenei ibaia garbi zegoeneko kontuak transmititzea: txanela, arrantza, hiztegia, jolasak… Gure intentzioa da etxolara hurreratzen denari aitzakia eskaintzea horretaz berba egiteko”.

24an, kalejira

Abenduaren 24an, goizeko 11:30ean harrera egingo diete Olentzero eta Mari Domingini udaletxe parean. Ondoren, Leire Elizbururen idi parea izango dute zain, Arkaitz Aranak Zeanuritik ekarriko duen burdi ederraren gainean kalejira abiatzeko. Bidean, gabon-kanta berriak ere abestuko dituzte: Olentzero ta astoa, Mari Domingi… Amaitzeko, kiroldegian gutunak jaso eta opariak banatuko dituzte.

Laguntzaileei eskerrak

Antolaketan dihardutenek eskerrak eman nahi dizkiete modu batera edo bestera muntaia lanetan eta kalejiran laguntzen duten guztiei: “brigadako langileei, arotzari, elektrizistei, iturginari, baserritarrei, belardendakoei, gurasoei, irakasleei…”.