18:00etarako ya Plaza Berri herritarrez beteta zegoen atzo, argien pizte ekitaldirako gogotsu.
Eman bizia, erosi herrian!
Ainhoa Ibartzabalek, Bizikale Merkatari Elkarteko ordezkariak Gabonen hasiera iragarri eta herritarren konpromisoa eskertu zuen ekitaldiari hasiera emateko: “Oso pozik gaude gaurko eguna zuekin ospatu ahal dugulako. Denon lana eta ardura da horrenbeste maite dugun gure herria bizirik mantentzea; horregatik Gabonei hasiera emateko eta gure dendekiko konpromisoa eskertzeko, Bizikalek herrian argiak jarri ditu, giro polita egon dadin. Txokolate bero-berora ere gonbidatzen zaituzte. Eman bizia erosi herrian!”.
Txupinazoa bailitzan
Ondoren hasi ziren bertaratutakoen artean txokolatea eta bizkotxoak banatzen, 40 litro inguru. Eta hura bukatutakoan, Zubi Nagusirantz joan ziren. Jaietako txupinazoko antzerako irudia erakutsi zuen atzokoan Zubi Nagusiak.
Atzera kontaketa
Eta horrela, bertaratutako jendeak lagunduta, 10-9-8-7… atzera kontaketa egin ondoren piztu zituzten argiak. Ooooohhhhhhhhh eginez eta txaloka adierazi zuten herritarrek argiekiko txundidura.
Zubi Nagusikoak piztu ondoren, Santa Ana kalekoak, Kalebarrenengoak eta Etxaburuetakoak pizten joan ziren. Gabonetako argiekin argazkiak ateratzen ibili zirenak ere izan ziren atzokoan. Izan ere, askoren ahotan entzun zen moduan: “Sekula ez dugu izan Soraluzen horrelako argirik!”.