Baba-janerako txartelak agortuta

Baba-janerako txartelak agortuta
Sebas Hernandez, Iñaki Larrañaga, Paulo Couto, Jose Antonio Estevez eta Iker Makinai izango dira sukaldariak, aurten hamargarrenez.

Karpako bazkarirako txartel guztiak salduta daude. 150 lagunek bazkalduko dute, bada, aurten Pil-pileanek antolatutako baba-janean. 15:00etan hasiko da, aurten mahaiak propio bazkarirako ekarriko dituztelako, eta ez dagoelako itxaron beharrik izango azokako mahaiak libratu arte. Arabako babak izango dira menua.

Babak sakramentu guztiekin. Horixe izango da, zela ez, zapatuan Plaza Zaharreko karpapean elkartuko diren 150 lagunek izango duten menua, Pil-pilean Euskaltzaleon Elkartearen eskutik. Dagoeneko ez dago lekurik bazkarian parte hartzeko.

Sukaldari iaioak

Bazkaria goxo-goxo prestatuko dute aspaldiko urteotan guztietan moduan honako sukaldari iaioek: Sebas Hernandezek, Iñaki Larrañagak, Paulo Coutok, Jose Antonio Estevezek eta Iker Makinaik. Arabako Heredia herritik ekarritako baba moreak prestatuko dituzte, 18 kilo guztira.

15:00etan hasiko da baba-jana, “puntu-puntuan, ordurako mahaiak-eta ipinita izango dira-eta”, esplikatu dute Pil-pileanetik. Izan ere, beste urte batzuetan ez bezala, aurten herri-bazkarirako mahaiak-eta, bertarako propio ekarriko dituzte, eta ez dira erabiliko azokako mahaiak. Beraz, ez da izango itxaron beharrik azoka batu arte.

Ostean, erromeria

15:00etan hasi eta 18:00ak aldera arte izango da karpapeko bazkalostean egoteko aukera. Ondoren, dena batu eta 19:00etarako libre laga beharko da-eta esparrua, Iratzar taldearen erromeriarendako.