Atzo iluntzean, eguaztena, jabetu ziren Udal Gaztelekuan lapurretan egin zutela, bertako begirale bat gaztelekura joan eta hango aparailu elektronikoak falta zirela ikusi zuenean. Lapurreta bera, baina, domeka gauean gertatu zela uste dute.
Apurtu barik
Barrura sartzeko ezertxo ere apurtzeke sartu ziren lapurrak: atea ondo dago, eta baita leihoak ere. Baina hasierako ikerketek emandako zantzuen arabera, lapurrak leiho batetik sartu dira, barrutik leihoetako bat ondo itxi barik laga eta gero. Gainera, gaztelekura sartu denak ondo zekien zer eraman eta non zeuden gauza guztiak gordeta, gaztelekua aldrebestu barik zegoen-eta.
2.000 euro pasa
Hiru musika ekipo, Wiia, telebista, urrutiko aginteak, jolasak, poltsikoko telefonoa, bertan zegoen diru apurra eta beste eraman dituzte; gutxi gorabehera 2.000 eurotan baloratutako materiala. Hori guztia eramateko, gainera, pertsona batek baino gehiagok parte hartu behar izan du lapurretan: gauza handiak eta pisudunak eraman dituztelako.
Planifikatuta
Horregatik uste dute ere, lapurreta aldez aurretik pentsatuta zegoela, lapurrek ondo aztertuta zutela ingurua ere lapurtutako guztia nondik atera eta zela eraman ere planifikatuta zutela.
Atzo, 20:00ak pasa zirela bertaratu zen polizia eta ingurua arakatu eta aztertu egin zuten. Udaltzaina eta ertzainak izan ziren guztia ikuskatzen, hartz markak hartzen eta abar. Ikerketa, beraz, zabalik dago.