Gaur goizean bertan zabaldu du Kooperatibako arrandegia Juan Mari Gurrutxaga elgoibartarrak, Mariasun Akizu lankidea ondoan zuela. Generoa txukuntzen zegoela, 09:00ak pasata dagoeneko bazuen bezeroa bertan erosteko gertu: “Niretzat erosoagoa da hemen erostea, pasoan dagoelako”, esplikatu du emakumeak.
Goiz eta arratsalde
Aurrerantzean, bada, Kooperatibako beheko solairuan ere izango da arraina erosteko aukera, goizez eta arratsaldez, Kooperatibako ordutegi berberean: martitzenetik barikura 08:30etik 12:30ak arte, eta 17:00etatik 19:45ak arte; eta zapatuetan 08:30etik 13:00ak arte.
2018ko urtarrilean zabaldu zuten eta uztailean bertan itxi egin zuten Kooperatibako arrandegia. Orain, atzera ere zabaldu dute arrandegi zerbitzua, berau hartu zuen enpresaren eta Kooperatibaren arteko tirabirak bideratu ondoren.