Hildako pertsona baten gorpua irudikatzen zuen silueta lurrean margotuta, eta Bizirik, Zutik zioten kartelak eskuetan, 60 herritar baino gehiagok salatu zuten Euskal Herrian izandako azken hilketa matxista. “Kronologia beltz honen aurrean, alto esan beharra daukagu!”, azpimarratu zuen Olatz Sebalek, Korner Moreko ordezkariak.
19:30ean elkartu eta ordu laurdenez egon ziren atzo, eguaztena, adin eta sexu guztietako 60 herritar pasa Plaza Berrian protestan. Maguette Mbeugou senegaldarraren hilketa matxista salatzeko elkarretaratzea egin zuten, hain justu.
Zazpi hildako
Amaieran, Olatz Sebalek, Korner Morea elkarte feministako kideak salatu zuen aurten zazpi emakume hil dituztela Euskal Herrian. Hain izenak eta hilketen datak banan-banan gogora ekarri ondoren, “kronologia beltz horren aurrean alto esan beharra daukagu!”, azpimarratu zuen.
