Errepidearen bi aldeetara ipiniko dituzte, eta kokaleku egokiena zehazteko argiztapen azterketa egin dute, Iker Aldazabal alkateak esplikatu duenez. Hark gaineratutakoaren arabera, eguzki panel bitartez funtzionatuko dute farolek eta led argiteria sistemakoak izango dira, herriko gainontzeko argiteriak erabiltzen duen sistema berekoak, alegia.
Segurtasun neurriak
Lanek iraun bitartean bertako bizilagunek aukera izango dute bertatik pasatzeko, baina hartu beharreko segurtasun neurriak hartuta, errepidean lanean ibiliko direlako.
Obren aurrekontua da 32.208 euro (BEZ barik). Gipuzkoako Foru Aldundiko Errepide Sailak egingo du inbertsioa. Diputazioak berak eraikitako Hirukurutzetako biribilgune berrira egindako bisitan iragarri zuten, hain justu, obra horiek ere egingo zituztela; “Soraluzeko Udaleko Udal Gobernuak egindako kudeaketari esker”, azpimarratu du alkateak.