“Ez dira konturatzen kalean zer pasatzen ari den”

Andreak, gizonak, gazteak, helduak, nagusiak, umeak… guztiek batera, aho batez eta ozen adierazi dute aski dela. Justizia bortxatzailea zioten kartelak eskuetan, 270 bat herritarrek salatu dute sanferminetako bortxaketa egin zuten gizonezkoen behin-behineko askatasuna eta baita ere, Asparrenan hilda azaldu den emakumearen hilketa ere. Ordu laurdenez, protesta horren ikur izan den zarata nagusitu da gaur erdigunean.

“Gaur ez ditut ja berbak aurkitzen ezer adierazteko. Gaur beste emakume bat eraila, atzo tipo horien askatasuna…Ez dira konturatzen kalean zer pasatzen ari den. Ze kalean hauxe ari da pasatzen, kalean jende guztia gaude kontra, baina ez dira enteratzen zein den herritarron nahia”, berba horiekin eta bertaratutakoei eskerrak emanez eman dio amaiera elkarretaratze zaratatsuari Olatz Sebalek, Korner Morea elkarteko ordezkariak.

Aniztasun handia 

Bertan zeuden herritarrek txalo artean babestu dute hark esandakoa. Herritarrek, zein politikariek. Izan ere, Deba Eskualdeko Koordinadora Feministak deitutako elkarretaratzean herritarrekin batera egon dira Soraluzeko Udalean ordezkaritza duten zinegotzi ia guztiak ere.

Herritarren artean, berriz, nabarmena izan da elkarretaratzean elkartu den aniztasuna. Kopurua bera ere esanguratsua izateaz aparte (270 bat lagunek parte hartu du), adin, sexu, lanbide eta pentsaera guztietako herritarrek bat egin dute, gaurko protestarekin. 

Erlazionatuak

Herritar asko eta askotarikoak, indarkeria matxista eta sistema patriarkala salatzen

Soraluze

Nabarmena izan da Deba Eskualdeko Koordinadora Feministak deitutako elkarretaratzeak erakutsi duen aniztasuna eta batasuna. Kopurua bera ere esangu...