Estaziñotik 08:30ean abiatuko dira 95 soraluzetarrak Hondarribi ingurura, zapatuan. Baina ez dira zuzenean asteburua pasatuko duten aterpetxera joango, baizik eta iritsi eta berehala egingo dute astebururako pentsatutako lehen mendi irteera: Pasaia-Ama Guadalupe. “Menditik jaistean, eguraldi ona bada, hondartzara joango gara”, jakinarazi diete irteerara doazenei, horretarako beharrezko guztia eraman dezaten.
Zapatu arratsaldea, afal ordura arte, Hondarribin pasatuko dute, eta ondoren, Juan Sebastian Elkano aterpetxera joango dira, afaltzera eta lotara.
Iparraldera
Eta hurrengo egunean, aterpetxean gosaldu ondoren, 10:00etan abiatuko dira Ziburutik Hendaiara bitarteko mendi ibilbidea egiteko. Domekan ere, eguraldia lagun bada, hondartzarako asmoarekin bueltatuko dira menditik eta 17:00etan irtengo dira Hondarribitik Soraluzera bueltatzeko.