plaentxia.eus

Mendizale nekaezinak

  Gizartea

Euria, haizea, eguzkia ala elurra egin, kikildu barik eta umorez, mendi-buelta eginez hasten dute eguna Nikanorrek, Marianek, Albertok eta Ramonek, eta noizbehinka, udaltzain lanak betetzen ez dituenean, baita Ninok ere. Urtebete daramate goizean goiz elkartu eta mendi ibilaldia egunero egiten, astelehenetan izan ezik.

Mendizale nekaezinak
Mendizale nekaezinak Ezozibidean, mendiko buelta eginda. | Ikusi handiago | Argazki originala

09:00ak inguruan Estaziñoko parke ingurutik pasatzen direnek ezagun askoak dituzte argazkiko lagunak, egunero-egunero bertan egoten dira-eta, makilak (edo guardasolak) eskuetan, mendiko botak aldean, kaletik mendirako bidea hartzeko gogotsu: “Txurrukatik San Andreserainoko bidea egiten dugu, eta eguraldi ona bada San Andrestik Kirueta ingurura igo, handik San Rokera joan eta Ezozitik kalera jaisten gara”, kontatu dute gaurko ibilalditik bueltan zetozela. 

Guardasola apurtuta 

Izan ere, gaur ere, goizean goizetik egin duen eguraldi traketsa ez da aitzakia izan eguneroko ohitura horri eusteko, eta kale egin barik hartu dute kaletik goranzko bidea. Hori bai, gaurko honetan, aldrebesko ibilbidea egin dute. “Haize eta euri honekin Ezozi aldera etorri gara. Hala ere, begira, guardasola ere apurtu egin digu gaur haizeak”.

Osintxura 

Ohikoa baino mendi-buelta motzagoa izanik gainera, gaurkoan Ezozibidetik kalera etorri eta euriak bustitakoa sikatzen laguntzeko kafesne eder bat hartu beharrean, “kia!, orain Osintxura goaz paseoan”, kontatu dute umoretsu eta indartsu. 

09:30ak aurretik lau lagunek zuten umore eta indar hori ikusita bada, zalantzarik ez dago, egunero mendi-buelta egitea zenbaterainoko osasuntsua eta gomendagarria den.  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa