Urtero moduan, goizean, dantzari eta musikariak Plaza Berrian elkartu ziren hamaiketakoa egiteko. Eguerdian, denak batera jo zuten Ezozirantz, eta han, Urratseko dantzariek dantza-ikuskizuna eskaini zuten plazan. Ostean, sukaldari taldeak prestatutako paella bazkaldu zuten berrogeiren bat lagunek, santutegiko atarian.
Arratsaldean, erromeriaren txanda izan zen. Imuntzo eta Belokik -Ander Pastoriza lagun hartuta-, denetariko doinuak jo zituzten; fandango eta arin arinak, mutikoak, polkak, salsa... Arrasateko gaiteroek girotuta, Larrain dantza ere egin zuten. Guztira, hiru bat orduz luzatu zen erromeria, gaueko 21:00ak aldera arte.
Aurten Ezozira aurreko urteetan baino jende gutxixeago hurreratu bazen ere, argazkietan ikusten den moduan, bertaratu zirenek egun ederra pasatu zuten.