22:00etan hasi eta 23:30ak aldera bukatu zen Biraka Zinema ikuskizuna barikuan, izan ere, 21 dantza prestatu zituen Debabarrenean dantza sustatzeko, erakusteko eta haiekin ikuskizunak antolatzeko Biraka elkarteak.
Hala ere, arin joan zen ikuskizuna. Dantza batetik bestera apenas segundu batzutako tartea lagata, di-da taularatu eta dantzatu zuten talde bakoitzak zegokion zinema-kantua edo doinua.
Elgoibar, Eibar eta Mendaro
Soraluzetarrekin batera, Elgoibartik, Eibartik eta Mendarotik ere bertaratu ziren dantzariak Arane kiroldegiko frontoira. Dotore dekoratu zuten hura, beltz kolorea nagusi zuen dantza-lekuarekin, eta maila oneko kontzertuek izaten dutena moduko argiztapenarekin.
Emaitzak gustura laga zituen ikusleak zein protagonista izan ziren dantzariak. Datorren urtean ekimena errepikatzeko gogotsu, seguru.
