Gaurko hotz handiaren adierazle argazkiko kandelak. Euririk egin ez arren, ur-tantak zeuden leku batzuetan kandela bilakatu dira haiek. Argazkia Arraikuan ateratakoa da, Erregetxera jaisten hasi baino lehenago, etxe urdinen aurretik.
Biharko elurra
Biharko, berriz, elurra dago iragarrita. Euskalmetek zera dio: "Asteazkenaren lehenengo partean neguko eguraldia izango dugu edonon; giroa goibela izango da, hotz egingo du eta elurra egingo du hainbat tokitan, baita kostaldean ere. Hegoaldean elurra indar handiagoz egingo du. Eguerditik aurrera tenperaturak epeltzera egingo du eta elur-kota azkar igoko da. Elurra egin beharrean, euria egingo du orduan, mendi inguruetan izan ezik, eta prezipitazioa noizbehinkakoa izango da; kantauri isurialdean atertzera egingo du nabarmen orduan. Egunaren amaieran izango dugu tenperaturarik altuena eta elur-kota 1500 metro inguruan egongo da. Elurraz aparte, hego-haizea ere albiste izango da, zakar ibiliko baita, batez ere ekialdeko eskualdeetan".