"Prest gaude, giza eskubideak, konponbidea, bakea" zioen pankartari jarraiki egin zuten atzo Bilbon, euskal presoen aldeko manifestazioaren ibilbidea, giro optimistago batean, Frantziako gobernuak iragarri ondoren euskal presoak Ipar Euskal Herritik gertuago dauden kartzeletara lekualdatuko dituela.
Berri horrek areagotu egin zuen Espainiako gobernuari zuzendutako eskari nagusiaren indarra: euskal presoei ezarritako salbuespeneko espetxe politika alda dezala.
Soraluzetarrek ere bat egin zuten Sare mugimenduaren eskakizun horiekin, eta atzoko euri zaparradei aurre eginez sakabanaketaren kontra eta oro har, euskal presoen eskubideak errespetatzearen aldeko aldarria partekatu zuten, ozen. Guztira, ehunen bat herritar joan ziren Sarek antolatutako bi autobusetan.
