plaentxia.eus

Berritasunekin dator aurtengo Errege desfilea

  Gizartea

Bihar, barikua, Errege Magoen bisita jasoko du Soraluzek ere, Beti Prest Aisialdi Elkarteari esker. Aurten, berritasunekin datoz Errege Magoak. Batetik, Errekaldetik beharrean Atxuriko plaza ondotik abiatuko da kalejira, Mesedeetako egoitzara bisita egin ondoren, horren harira Jose Gilek (antolatzaileetako batek) adierazi du “haien ondoan joan nahi duten neska-mutikoek 19:00etan egon beharko" dutela Atxuriko plaza inguruan. 

Berritasunekin dator aurtengo Errege desfilea
Errege Magoak opariak ematen, eliz atarian iaz. | Ikusi handiago | Argazki originala

Bestetik, erregeek karrozen laguntzarik barik, baina zaldiz egingo dute kalejira, azpiegiturak lortzeko zailtasunak tarteko. “kalejira antolatzen dihardugun 25-27 urteotan gero eta azpiegitura arazo handiagoak izan ditugu, garajea lortzeko… iaz ere justu-justu lortu genuen. Hortaz, aurten erabaki dugu kalejira zaldiz egitea” esplikatu du Gilek.

600 opari inguru

Hortik aurrera, ez da bestelako aldaketarik izango kabalkadan. 50-60 bat kilo gozoki banatuko dituzte ikusleen eta kalejirako partaideen artean. Eta gertu dituzte 600 opari inguru, eliz-atarira bertaratzen diren neska-mutikoen artean banatzeko.

Hori guztia urtez urte posible egiten dihardute Beti Prest Aisialdi Elkarteko ordezkariak. Batez ere lau kide aritzen dira lan horietan: Silvia Fajardo, Elena Cadenas, Juncal Iglesias eta Jose Gil. Laurek eskerrak eman nahi dizkiete urte hauetan guztietan laguntzen ibili zaizkien guztiei: pajeei, traktorea laga dietenei, gurasoei eta abarrei.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa