Lursaila eskuratuta, bertako pinudia bota egin dute; izan ere, Udalaren helburua da han belardiak sustatzea eta bultzatzea,“bertako ganadua (zaldiak, behiak, ardiak, orkatzak…) hor gustura egoten delako, laua delako eta belar ona irteten delako”, esplikatu du alkateak.
Edozein modutan, proiektu handiago baten zati da orain eskuratu duten lursaila. Horrela, azken hiru urtean mendi-gaineko ia sei hektarea eskuratu ditu Udalak, 59.000 metro karratu pasa, alegia.
Mendilerroa balioan jarri
Aldazabalek esplikatu du inguru hura balioan jartzea dela helburua: “Badihardugu Kakarakate-Hirukurutzeta mendilerroa balioan jartzeko lanketa egiten Elgoibar, Bergara eta Soraluze udalerrien artean eta Debegesaren laguntzarekin. Gure apustua da Soraluzeko terrenoen barruan dauden lursailak erosten joatea, esandako moduan, balioan jartzeko. Izan ere, lau alor jarri nahi ditugu balioan: ingurumena, paisajea, ondare arkeologiko-historikoa (dolmenak daude) eta abeltzantza. Ze bultzatu nahi dugu larreak garatzea, ganaduak aukera izan dezan bertan bazkatzeko. Apustu inportantea da, eta erosketa horrekin puzzleko beste pieza bat eskuratu dugu; kasu honetan, lursail inportantea. Hurrengo urtera begira ere ipini dugu beste diru partida bat lursailak erosteko”.