Halakoetan ohi den moduan, aurrekontua lantzeko erabili dituen irizpideak azalduko ditu Udal Gobernuak, zeintzuk diren lehentasunak eta horren baitan, datorren urterako inbertsio nagusien berri emango du.
2018rako aurrekontuaz gainera, datorren urterako aurrekontuaren exekuzio-araua, 2018ko lan-talde organikoa eta 2018ko lanpostuen zerrenda ere izango dute aztergai udalbatzarrean.
Eta jakina, oposizioak, bere aldetik, proposamenaren gainean duen irakurketa azalduko du.
Kiroldegi zerbitzua
Horrekin batera, besteak beste, Soraluzeko zerbitzu garrantzitsu baten esleipenaren berri emango dute: udal kiroldegia ze enpresak kudeatuko duen datozen urteotan. Gaur egun 900 bat bazkide ditu Soraluzeko kiroldegiak.
Eta beste pare bat gai aipatze aldera, Udal Gobernuak jakinaraziko du Errekalde kaleko etxe baten jabetza eskuratu duela, bertako jabeek erakundeari egindako lagapen bitartez; eta lursail baten erosketaren berri ere emango du: Idoi-Azkabeitiaburua izeneko lursaila da Soraluzeko Udalak erosi duena, hain justu.