Hain justu ere, orain dela 25 urte, Soraluzeko abesbatzaren aurreneko pausoetan jendaurrera salto egiteko bidelagun izan zituzten lagun berberak ondoan izan zituen Ezoziko Ama Abesbatzak, oraingo honetan ere, ospakizun berezirako: Elgoibarko Udal Musika Bandako musikariak.
Agerikoa izan zen bi taldeen arteko harreman ona, taula gainean zein musikalki. Eta indar hori eta elkar-osatze hori transmititu zioten kiroldegian elkartu ziren ikusleei, herritarrak gehienak baina batzuk Eibartik zein Elgoibartik ere etorritakoak.
Hunkituta
Errepertorioak kantu anitzak izan zituen: arinak, dantzagarriak, hunkigarriak, kantatzeko gonbita egiten zituenak… eta zela ez, Gabonetakoak ere bai. Hain zuzen, data kontuan hartuta, errepertorioan ez zetorren kantu batekin bukatu zuten atzoko jarduna: Hator Hator.
Eta musikalki, berriz, ondo antzeman ziren horrenbeste astetako entseguek emandako fruituak; herritar batek baino gehiagok aipatu zuen oilo-narrua atera zitzaiola tarteka, emozionatuta.
Gorka Mujikak, Elgoibarko Musika Bandaren oraingo zuzendariak gidatu zuen musika saioa; aurkezpenak, berriz, Txomin Mujikaren, orain dela gutxira arte bertako zuzendari izandakoaren ardurapean egin ziren, bikain egin ere.
Esker-ona
Ezoziko Ama Abesbatzak, bestalde, kontzertuaren amaiera aprobetxatu zuen esker-ona helarazteko. Ordezkari bakoitzari oroigarri bana emanez, Soraluzeko EAJri (Batzokia lagatzearren), Kooperatibari, Soraluzeko Udalari, Elgoibarko Udal Bandari eta abesbatzako zuzendari Silvia Hernandezi helarazi zieten, hain zuzen ere, esker-on hori.
