Atzo, astelehena, 11:00etan zabaldu zuten bilketa berriarekin lotutako informazio eta banaketa puntua, eta ordubetean bederatzi herritar pasatu ziren udaletxeko osoko bilkuren aretotik.
%50eko tasa gainditzea
Izen-emate orria bete, txartelak eman eta organikoa sailkatuta bideratzeko beharrezko guztia banatzen dabiltza Vermican enpresako langileak. “Nahi dena da 2020. urterako bilketa selektiboak %50eko tasa gainditzea; besteak beste, Europatik hala eskatu dute, ekonomia zirkularra tarteko; eta Gipuzkoako eskualde askok dagoeneko tasa hori gainditzen dute”, esplikatu du Zuberoa Jauregik, Vermican enpresako langileak.
“Sortzen dugunaren %40 organikoa da. Orain arte kolore askotako edukiontziak izan ditugu: papera batzekoak, beirarako, poteendako… baina ez dugu %50eko tasa gainditu. Beraz, helburu hori lortu nahi badugu, organikoaren sailkapenean eragin beharra dago”, gaineratu du hark.
Batzarra, 18:30ean
Vermican enpresako Zuberoa Jauregi, Adur Campo, Ania Ibarguren eta Tamara Zapiain egongo dira, bada, abenduaren 21era bitartean udaletxeko osoko bilkuren aretoan, kuboak-eta banatzen, informazioa helarazten eta egon litezkeen zalantzak argitzen. Ordutegia, honakoa: lanegunetan 11:00etatik 20:00ak arte, eta zapatuan, 09:00etatik 14:00ak arte.
Hain justu ere, gaurko batzar informatiboan (18:30ean herriko antzokian) eurak ere izango dira. Edozelan ere, Debabarreneko mankomunitateak eta Soraluzeko Udalak antolatu dute batzar informatibo hori, beharrezko azalpen guztiak emateko.