Soraluzeko paisaiak, gai abstraktuak, afrikarrak, animaliak, marrazki bizidun ezagun bateko protagonistak… halakoak eta beste margotu dituzte Krabelin Pintura Eskolako ikasleek eta ikusgai ipini Kultura-guneko erakusketa aretoan.
Jende asko
Atzo zabaldu zituen ateak erakusketak, eta eskolako margolari batzuk eurak eta haien senideak gogotsu sartu ziren, eurek landutako lanekin osatutako erakusketak ze itxura duen ikustera. Bestelako ikusle batzuk ere sartu ziren, erakusketa zabaldu eta berehala. Beraz, bete samar egon zen aretoa estreinako egunean. Ikusleek, gainera, margolanen gaineko komentario positiboak partekatu zituzten.
Erakusketa bi astez izango da zabalik, astegunetan 19:00etatik 20:30era eta zapatuetan 12:00etatik 13:30era.