plaentxia.eus

Kontzertu luzea eta beroa eskaini zuen Benito Lertxundik zapatuan

  Kultura

Jende asko elkartu zen frontoian Benito Lertxundiren kontzertua entzutera; bostehun lagunetik gora. Oriotarrak bi ordutik gorako kontzertu beroa eskaini zuen, eta ikusleak zutik zirela eta haien txalo zaparradarekin bukatu zuen saioa.

Herriko jende askok eta inguruko herrietatik etorritako beste askok (Bergara, Osintxu, Elgoibar, Eibar…) bat egin zuten zapatuan Soraluzeko kiroldegiko frontoian Orioko abeslariaren Kontzertua entzuteko. Gogor jardun zuen hark, eta bi ordutik gorako saioa eskaini zuen.

Klasikoak eta berriak

Berak esan zuen moduan “elkarrekin kantatzeko” kantu ezagun batzuk jo bazituen ere, (Zenbat gara, Nire herriko neskatxa maite, Baldorba, Jaun baruak eta abar), azken diskoko kantuak eta laster kaleratuko duen diskoko bestelako kantu mordoa ere jo zituen, “kantuok, lehenengo aldiz, publikoaren aurrean probatzeko”. Folk kantu lasaiak eta solemneak oro har, gaitzat maitasuna, natura, herria…. dauzkatenak. Lagun izan zituen musikarien maila altua, berriz, berbetagai izan zen ikusleen artean kontzertua amaitu ostean. Azken horiek zutik eta txalo zaparradarekin agurtu zuten Orioko abeslaria.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa