Martitzenean hasi zituen Aranzadik Gizaburuagako hilobi prehistorikoa industeko lanak. Bost laguneko lan-taldea osatu dute Aranzadiko kide eta laguntzailerekin eta Jesus Tapia arkeologoaren gidaritzapean, zedarritutako eremuan belarrak eta lurra kentzen hasi dira, azpian egon daitekeen harlauzazko ganbararen bila. Lurra kendu ahala jakingo dute harlauzarik baden, ala desagertuta dagoen. Dena den, Tapiaren esanetan, harlauza aurkitu hala ez, lurra kentzeko prozesuan hainbat material ager litezke eta interesgarria da industea.
Bisita gidatuak
Aranzadik bisita gidatuak antolatu ditu irailaren 24an eta urriaren 1ean. Bisitetan parte hartzeko aurrez izena eman beharra dago 943 46 61 42 telefonora deituta (9:00etatik 14:00etara) edo idazkaritza@aranzadi.eus helbidera idatzita. Azalpenak Aranzadiko kideek emango dituzte eta Gizaburuagako indusketak ezagutzearekin batera, Atxolin inguruko megalitoen berri ere emango dute. Egunotan eskolako eta institutuko ikasleak ere joango dira indusketak ezagutzera.