Abigail Monserratek urrezko domina jaso zuen domekan Andoainen egin zen XI. Piano Jaialdian. Epaimahaiaren aipamen berezia ere jaso zuen, eta, hargatik, jaialdiko itxierako kontzertu berezian parte hartzeko aukera izan zuen. Chopinen Preludio 4. lana interpretatu zuen.
Andoaingo Piano Jaialdian oso ekimen entzutetsua da eta 18 urtez azpiko Euskal Herriko 800 pianojolek baino gehiagok parte hartzen dute. Horietatik hogeik bakarrik eskuratu dute aipamen berezia. Abigail Monserrate Lozanok hamasei urte ditu eta zortzi inguru daramatza Soraluzeko musika eskolan. Aurretik ere sari ugari lortu izan ditu Andoainen, esaterako, iaz ere urrezko domina eta aipamena jaso zituen.