Soraluzeko Gaztelupeko Hotsak zigilua Austineko (Texas) "South by Southwest" jaialdian izango da gaurtik datorren martxoaren 20ra. Musika, zinea eta interaktibitateari zuzendutako azoka da hau eta bost egun hauetan musikak izango du protagonismoa. Ez da Hotsak-ek kanpoko azoka batean parte hartzen duen lehen aldia, hala azaldu du Ubane Uzin, zigiluko arduradunak:
"Gu normalean, urtean zehar Euskal Herritik kanpo egiten diren musika
ferietara joan izaten gara (Midem-Cannes, PopKom-Berlin,
Womex-Copenhagen, Vic-Katalunia, Monky week- Puerto de Santa maria...)
Orain dela urte batzuk hasi ginen horrela kanpoan zer egiten den
ikusteko, gure katalogoa erakusteko, kontaktuak egiteko...Egia esan
oso mesedegarri egin zaigu. Salmentak eta harreman
interesgarriak egitea lortu dugu eta merkatua eta musika mundua nondik
nora dabilen ikusi ahal izan dugu". Gainera, eurekin diskoa atera duten Capsula Euskal Herrian bizi diren argentinarrek kontzertua eskainiko dute bertan.
Profesionalen azoka
Austingo jaialdi hau rockeroagoa dela dio Ubanek eta ez omen dira hemengo estiloko azokak izaten, bertatik bertara saltzekoak baizik eta profesionalenak: "Ez dira zuzenean saltzeko azokak. Hara joaten
direnak profesionalak izaten dira: diskoetxeak, banatzaileak,
musikariak...eta emaitzak askotan ondoren nabarmentzen dira. Guk lortu
izan ditugu diskoak kanpoan lizentziatzea, salmenta zuzenak egitea,
beste herrialdetarako banaketa estableak eta horrelakoak lotzea".
Kontua da euskal zigilu bat lehenengoz Austingo azokan egongo dela eta nahiz seguru ez dakiten zela joango zaien itxaropentsu doaz: "Ameriketan, Europarekin alderatuz seguru gauzak desberdin funtzionatzen dutela. Baina beti bezala itxaropentsu gaude".
