Udaleko Berdintasun sailak antolatuta Helena Tabernak
zuzendutako NAGORE dokumentala proiektatuko dute gaur 19etan Zinean.
Luzemetraiak 2008an Iruñeako Klinika Unibertsitateko psikiatra batek San
Fermin jaietan Nagore Laffage erizaintza ikasle nafarraren aurka
egindako hilketa kontatzen du.
Filmea Laffageren amaren hitzek gidatzen dute eta
senideen testigantzak eta juizioan parte hartu zutenen iritziak jasotzen
ditu. Bi aldeetako fiskalen esanak eta genero indarkeriaren aurkako
taldeen iritziak ere entzun daitezke. Dokumentalean gertaera tamalgarria
gogoratzeko artxiboko irudiak eta gertaeren errekonstrukzioak
tartekatzen ditu.
Yoana Azpitarte, Berdintasun Teknikaria:
"Parte hartze haundia egon da ekintzetan"
Gaurko proiekzioa, berdintasun sailak genero
indarkeriaren aurka antolatutako egitarauko azken ekintza izango da.
Yoana Azpitarte udaleko berdintasun teknikariak positibotzat jo ditu
jardunaldiok, "Soraluze herri txikia izan arren parte hartze altua
egon da ekintzetan. Ikusten da eskaintzen dugun zerbitzua pixkanaka
indarra hartzen doala".
Guztira bost ekintza egin dituzte, "Amores que matan"
filme laburraren emaldian eta kafe tertulian 18 emakumek hartu zuten
parte; emakumeentzako antzerki eta jolas tailerrean 18 lagunek eta
Autodefentsa ikastaroan zortzi emakume hurbildu ziren. Horrez gain
hainbat kontzentrazioa egin dituzte genero indarkeriaren aurka "Beldur
Barik!" lemapean.