Udalak lehiaketara atera zuen apirilean Itxaropena jubilatuen etxeko taberna, kafetegi eta jatetxearen kudeaketa-zerbitzua, Etxaburueta kaleko 5. zenbakian dagoena, aurreko lizitazioaren epea iraungi ostean. Maiatzaren 26ko Alkate Dekretuaren bitartez, orain arteko kudeatzaile berari, Esmeralda Avelinori, esleitu zaio kontratua, puntuaziorik altuena atera baitu.
Zerbitzua bi urterako esleitu da eta urtero luza daiteke, lau urtera arte. Gainera, esleipendunak hileko 200 euro + BEZa ordainduko dio Soraluzeko Udalari, udal jabetzakoa den lokala erabiltzeagatiko kanon gisa. Espazioa behar bezala egokituta eta ekipatuta dago, dagokion zerbitzua emateko. Elektrizitateari, gasari eta urari dagozkien gastuak, bestalde, Soraluzeko Udalak ordainduko ditu.