Azken urteetan egiten duten moduan, ibai garbiketa antolatu dute Soraluzeko Udaleko Ingurumen eta Landa Garapen Departamentuak, herriko Soraluzeko Baso Biziak Elkarteak eta Lurgaia fundazioak, aurten, herriko beste hainbat eragile eta elkarteren parte-hartze bereziarekin.
Maiatzaren 10ean, goizeko 9:30etan elkartuko dira bolondresak Plaza Barrixan.
Sekula baino kolaboratzaile gehiago
Ibai garbiketaren antolatzaileek herriko eragile eta elkarte ugariren kolaborazioa eskatu dute aurten; izan ere, elkarrekin lan egiteak ekintza herritar gehiagorengana hurbiltzeko eta modu komunitarioagoan egiteko aukera ematen du. Hori dela eta, aurten, Soraluzeko AEKk, Gaztelekuak eta Atxolin eta Keixeta IGEk ere parte hartu dute antolaketan, ibai garbiketaren helburuekin bat eginez:
- Ingurumenarekiko konpromisoa sustatzea.
- Herritarren inplikazioa areagotzea.
- Komunitateko kide guztien parte-hartze aktiboa bultzatzea.
Arropa egokia eta antolaketa
Antolakuntzak parte-hartzaileei eskatzen die arropa zaharra eta erosoa eramateko eta uretan sartu nahi izanez gero (ez da derrigorrezkoa) gomazko botak edo badeadorea; eskularruak eta lanerako tresnak antolakuntzak ipiniko ditu, eta garbiketarekin bukatu ostean, hamaiketakoa ere eskainiko du parte-hartzaileentzako.
Bazkal ordurako etxera itzuliko dira parte-hartzaileak.
Izen-ematea, maiatzaren 8 arte
Izena emateko, bidali e-mail bat, eguena, maiatzaren 8a baino lehen izen-abizenak, adina eta herria zehaztuz helbide honetara (Gaia: ibai garbiketa, Soraluze):
- info@lurgaia.org
- soraluzekobasobiziak@gmail.com
