Apirila liburuaren hilabetea izaki, eta euskarazko irakurzaletasuna sustatu eta euskal liburu edizioari bultzada emateko, Irakurri eta gozatu kanpaina jarri dute martxan udaleko Hizkuntza Politika Batzordeak eta Udal Liburutegiak. Aurten, gainera, maiatzaren 25era arte luzatu du kanpaina, Euskaraldiarekin bat egin eta hura amaitu arte euskal kultura kontsumitzeko erraztasunak emateko.
Liburu-saltokiak eta funtzionamendua
Azken urteetan egin izan den moduan, aurten ere, herriko hiru liburu-saltokiek parte hartuko dute Irakurri eta gozatu kanpainan: Arzelusek, Estankoak eta Iratxok, hain zuzen ere.
Soraluzen erroldatutako herritarrek euskarazko edozein liburu eskuratu ahal izango dute kanpainak dirauen artean %50eko deskontuarekin: erosleak prezio erdia ordainduko du eta udalak beste erdia. Herritar bakoitzak bi bono erabili ahal izango ditu eta bakoitzarekin liburu bakarra erosi ahal izango da. Bonoak Soraluzeko liburu-saltokietan egongo dira, eta bertatik kudeatuko da deskontua.
Euskarazko nobedade eta gomendio zerrenda liburutegian
Irakurri eta gozatu kanpainaren antolatzaileek adin guztietarako euskarazko nobedade eta gomendio zerrenda argitaratu dute: 2025eko gomendioak. Gainera, udal liburutegian eskuragai daude guztiak maileguan hartu ahal izateko.
Antolatzaileek soraluzetar oro animatu nahi dute kanpainan parte hartu eta euskaraz irakurtzera.
