Goizetik hasi eta iluntzera arte, adin eta gustu guztiak asetzeko moduko ekintza eskaintza izango da gaur Soraluzen, hainbat eragilek antolatuta.
Bizikale Gabonetako Azoka
Bertako merkataritza bultzatu eta herritarrei gabon-sasoirako erosketak egiteko aukera emateko helburuarekin, Gabonetako Azoka antolatu du gaurko Bizikale Merkatarien Elkarteak. Azokak goizeko 10:00etatik iluntzeko 20:00etara egongo da zabalik Plaza Zaharreko karpan eta zortzi saltokik jarriko dute bertan postua, era guztietako produktuekin.
Ohi den moduan, azokan erosketak egiten dituztenen artean 25 euroko lau sari banatuko dira, Bizikaleko saltokietan gastatzeko.
Biderbost artistaren erakusketa
Fernando Biderbost (Bilbo, 1955) artista bilbotarrak pintura erakusketa irekiko du arratsaldeko 19:00etan Oreka Art galerian. 70eko hamarkadan ekin zion artista ibilbideari eta autodidakta da; bere lanari buruz abstraktoa eta anarkikoa dela dio.
Abenduaren 27ra arte izango da ikusgai, astelehenetik barixakura, 19:00etatik 20:00tara.
Gozaldia: umorezko bakarrizketa
Gozaldiari hasiera emateko, bariku iluntzean, umorezko bakarrizketa saioa egingo dute Asier Galarza eta Jokin Ansotegi umoregileekin, Gaztetxean. Emanaldia 20:00etan hasiko da eta antolatzaileek jakinarazi dute barra zabalik izateaz gain, berogailua ere piztuta izango dela.
Punta-puntako pilota partidak
Iluntzeko 21:00etan hasita eta Soraluzeko Pilota Elkarteak antolatua, hiru pilota partida izango dira ikusgai Kiroldegiko pilotalekuan: emakumezkoen lau t'erdikoa, promesa mailakoen eskuz binakakoa eta nagusi mailakoen eskuz binakakoa. Sarrera doakoa izango da.
| Aldai | Arrillaga |
|
Murua Fernandez |
Ibarra Moto |
|
Egiguren Lazkoz |
Fernandez Landa |