Soraluzeko Udalak etorkinentzako harrera-ikastaro linguistikoa antolatu du, gurera etorri eta euskara ikasten hasi nahi duten pertsonentzat.
Ikastaroaren helburua etorkinek hemengo gizartea, ohiturak, etab. ezagutzea eta euskara ikasteko lehendabiziko urratsak ematea da.
Ikastaro honetan gizartea ezagutzeko aukera ematen duten hainbat gai motibagarri lantzen dira, hala nola: aurkezpenak, zenbakiak, familia, eskola, garraioa, osasuna, kirola, azoka... Ariketetan gai horietako hiztegia eta oinarrizko ulermena (kaleko errotuluak, kartelak...) landuko dira, batez ere.
Ikastaroak 60 orduko iraupena izango du, 6 ordu astean. Apirilaren 12an hasi eta ekainaren 16an amaituko da. Astearte, asteazken eta ostegunetan izango dira eskolak, 10:00etatik 12:00etara.
Ikastaroa debaldekoa da eta Eusko Jaurlaritzak eta Soraluzeko Udalak finantzatzen dute.
Ikastaroa amaitzean berau egin izana ziurtatzen duen agiria jasoko dute ikasleek.
Izena eman nahi dutenek Udaleko Euskera edo Ongizate Zerbitzuetara jo behar dute edota 943-753043 zenbakira deitu martxoaren 23a baino lehen.
