1931: Lehen jai egitarau elebiduna

Erabiltzailearen aurpegia

Soraluzeko jaiekin batera egitarauak agertzen dira: programatutako ekintzak, herriko lantegi eta negozioen iragarkiak, historiaren gaineko artikulu bat edo beste... Gordetzen direnek (1931-2019) panorama nahikoa edo zeharo erdaldundua erakusten dute, baina badira salbuespenak.

Lehen egitarau elebiduna 1931.ean egin zen, Errepublika sasoian. Aurreko urteetakoak gaztelera hutsean atera omen zituzten, baina orduko Udalean jeltzaleak nagusi izan zirenez, beste aldaketa batzuen artean jai egitaraua elebitan atera zuten.

Gordetzen den hurrengo egitaraua 1939.ekoa da (Año de la Victoria) eta, espero denez, bakarrik erdaraz atera zuten.

Erdara nagusi izan zen hurrengo urtetan. Baina 1973an Soraluzeko Erret Lantegien IV. mendeurrena ospatu zen, eta jai egitarau berezia atera zuten, bikoitza: gazteleraz eta euskaraz.

Hurrengo urtean (1974) jai egitaraua gaztelera hutsez atera zuten berriro… baina Iñaki Leteren euskarazko artikulua agertu zen bertan, Andramarixak izenekoa.

Beste hiru urte itxaron behar izan zen jai egitarauetan euskara agertzeko: 1977. urtean behin behineko Udala zegoela (lehen hauteskunde demokratikoak hurrengo urtean egin ziren), jai egitaraua elebitan atera zuten berriro. Ordutik aurrera hala mantendu da.

Hala ere programek, jaietako ekintzez gain, iragarkiak ekarri ohi dituzte (lantegiak, dendak, tabernak…) eta herriari buruzko artikulu bat edo bi. Atal hauetan gehiago kosta izan da gaztelerazko inertzia apurtzea, baina gaur egun egoera orekatzen ari da.

Bideoan azken larogeita hamar urtetako programen ia azal guztiak ikus daitezke, Encarna Astiazarán eta Narciso Larrañagaren bildumetatik hartuta. Bitxikeria gisa, aipa daikete programen azala beti berria izan dela… bi salbuespenekin: 1960an (1951koa berrerabili zuten), eta 1966ean (aurreko urtekoa kopiatuta). 

Programa guztiak ikusteko, sakatu hemen.