Berez, Santa Barbara martiria ekaitzen eta tximisten aurkako babeslea da; eta horregatik indarra, sua eta leherkariekin lotutako lanbideen patroia da: armagile, artillero, meatzari, elektrikari, suhiltzaile... Eta honetaz gain, urtzaile, hargin eta ferianteena ere.
Horregatik, SAPAk (Sociedad Anónima Placencia de las Armas) bere patroitzat hartuta zuen. Sasoi batean, abenduak 4 jaia izaten zen SAPAn. Goizean meza nagusia parrokian, eta eguerdian bazkari ederra izaten zuten ekonomatoan, zuzendari, bulegari eta langile guztiekin.
Honetaz gain, 1950. hamarkadan parrokiak Soraluce zinema eraiki eta azpian sakristia berria jarri zuenean, hutsik geratu zen kaperan SAPAk Santa Barbarari eskainitako erretaula ordaindu zuen. Bai erretaula zein irudia José Díaz Bueno eskultoreak egin zituen. Eliza zaharberritzerakoan, erretaula kendu eta biltegia eta komunak jarri zituzten.
Baina Soraluze eta Santa Barbara lotuta izan dira aurretik ere. XVIII. mendean bere omenezko kofradia izan zen: 1746.eko urtarrilak 19an Gremioen Batzar Orokorra bildu zen eta, Manuel Echevarriak proposatuta, Santa Barbararen kofradia sortu zuten. Urteekin kofradia hau desagertu zen.