Errebote-frontoia: bista-bistan eta ezkutuan

Soraluzek dozena erdi frontoi ditu herrian zehar sakabanatuta, baina denetan handiena "ezkutuan" dagoerrebote-frontoia. Bera da gure betiko "Frontoia" eta Frontoia esaten diogu, frontoiaz gain, eliza ondoko esparru osoari ere: haurtzaindegia, institutua eta Musika Eskola dagoen eremuari. Hain zuzen ere, garai batean, eremu horretan guztian frontoia zegoen, errebote-frontoia. 
Errebote-frontoia 1788 urtean diseinatu zuten, eta egizabaldar indianoen eta aldasorotarren diruaz eraiki. Arkitektoa, 1804-1809 bitartean Erregetxea diseinatu eta altxatu zuen pertsona bera izan zen: Miguel Antonio de Jauregui.
 
Frontoiak bi eremu zituen: bata, luzea, 53 metrokoa, sake eremuari zegokiona; eta bestea, motza, 11 metrokoa, erresto eremua. Zabaleran 17 metro zituen, eta alde banatan, ikusleentzako harmaila ederrak zituen, harlauzaz eginak. 
 
XIX. mendean, errebotea poliki-poliki indarra galtzen joan zen herrian, ia erabat ahaztu arte, eta harrezkero, desagertu egin da ia dena: pasamarra, sakarria (sake harria), harmailak... Azken urteotan eremu handia hainbat jardueretarako erabili izan da: eskolako patio moduan, kiroletarako (fulbito, esku-baloi...)... Eremu txikia, berriz,  estali egin zuten 70. hamarkadan, eta azken urteotan, batez ere, frontenisean eta saski-baloian jokatzeko erabiltzen da.  Harmailei dagokienez, bi zati txiki besterik ez dira geratzen.
 
Esan liteke, beraz, "Frontoia" izena eta errebote frontoiaren esparrua guztion bista-bistan daudela eta ezkutuan ere bai aldi berean.
 
Soraluzeko errebote-frontoiaren gaineko informazio gehiago  kontsultatu nahi baduzu (argazki zaharrak barne), sakatu hemen.